තම කළණිය අතහැර ගිය නන්දට

"මා මැව් ලෝ මව්තුමියනි ඔබහට

පින් දෙමි මා සුර අගනක් නොකලට..."

සුර ළදගේ රූ සපුවට ලොබබැද 

තම සොදුරිය අතහැර ගිය කුමරුට 

කල්පකාලයුග ගනනින් පෙම්කල

තම කළණිය අතහැර ගිය නන්දට..

කිසිදා හැබැහින් නොදුටු රුවක් වෙත

පෙරුම්පුරා ලොබ බැදි මිනිසෙකුහට

බුදුහිමියනි ඔබ සසුනේ කොතැනක 

ඉඩක් හිමිද ලැබගන්නට සුරමග..

මා රූ සපුවට පෙම්කල ඇතිමුත්

ඔහු නැත මා හදවත හදුනාගෙන

ඉදින් එවන් මිනිසෙකු මා සතුවී

පලකිම ඔහු රජ කුමරෙකු වූවත්..

වියෝ දුකින් මා හදවත පෙලුනත්

ඔහු හදවත මා දැන් හදුනන්නෙමි

මා මැව් ලෝ මව්තුමියනි ඔබහට

පින් දෙමි මා සුර අගනක් නොකලට...